Resolución de 28 de junio de 2024, de la Consellería de Empleo, Comercio y Emigración, de inscripción y publicación del Convenio colectivo del sector de pintura de la provincia de A Coruña para los años 2022-2026

Artigo 1 Extensión

Este convenio é de aplicación a todo o persoal ao servizo das empresas encadradas no CNAE 4334, Pintura e acristalamento, con centros de traballo da provincia da Coruña (sexa cal sexa o seu domicilio social), que se dedican principalmente ás seguintes actividades:

• · Pintura interior e exterior de edificios.
• · Pintura de obras de enxeñaría civil.

Exclúese da aplicación obrigatoria do Convenio ás empresas do mesmo CNAE que, reunindo as demais condicións anteriores, se dedican principalmente ás seguintes actividades:

• · Instalación de vidros, espellos, etc.
• · Recubrimentos de xanelas e acristalamentos con capa adherente.

Artigo 2 Vixencia

O Convenio entrará en vigor o día da súa publicación, aínda que os seus efectos económicos empezarán a rexer a partir do 1 de xaneiro de 2022 e a súa vixencia será desde 1 de xaneiro de 2022 ao 31 de decembro de 2026.

Artigo 3 Denuncia automática

Ambas as partes comprométense a iniciar a negociación dun novo Convenio con dous meses de antelación á finalización da súa vixencia.

O Convenio Colectivo manterá a súa vixencia ata a entrada en vigor dun novo Convenio que o substitúa.

Artigo 4 Respecto de Dereito

Respectaranse a todo o persoal as situacións persoais actualmente consolidadas en canto determinen maiores dereitos dos concedidos por este Convenio, respecto das materias obxecto da súa regulación.

Artigo 5 Compensación e absorción

Sen prexuízo de que se poidan estender a calquera situación persoal as melloras establecidas no Convenio e mesmo amplialas, as Empresas que veñan aboando salarios superiores aos regulamentariamente esixidos, non estarán obrigadas a aplicar as elevacións que por estas estipulacións se fixan, máis que na medida necesaria para suplir diferenzas. Así mesmo, as melloras establecidas no Convenio serán compensables ou absorbibles por calquera elevación salarial que por disposición legal se puidese establecer.

Artigo 6 Garantía persoal e condición mínima

Serán respectadas as condicións superiores pactadas con anterioridade a este Convenio, ou que se pacten durante a súa vixencia, con persoas ou grupo de persoas, polas Empresas afectadas por el, sempre que no seu conxunto ou cómputo anual superen as establecidas por este Convenio, debido á condición que ten de normas mínimas de relación, tanto no que se refire ao social como no económico.

De acordo co art. 84 do Estatuto dos Traballadores, durante a vixencia do Convenio a regulación das condicións deste poderán verse afectadas por un convenio de Empresa, que se poderá negociar en calquera momento, e terá prioridade nas seguintes materias:

• a) O aboamento ou a compensación das horas extraordinarias e a retribución específica do traballo a quendas.
• b) O horario e a distribución do tempo de traballo, o réxime de traballo a quendas e a planificación anual das vacacións.
• c) A adaptación ao ámbito da empresa do sistema de clasificación profesional do persoal.
• d) A adaptación dos aspectos das modalidades de contratación que se atribúen por esta Lei aos convenios de empresa.
• e) As medidas para favorecer a conciliación entre a vida laboral, familiar e persoal.
• f) Aqueloutras que dispoñan os acordos e convenios colectivos a que se refire o artigo 83.2.

Artigo 7 Normas complementarias

No que non estea previsto neste Convenio estarase ao que dispón o Estatuto dos Traballadores e demais disposicións vixentes.

Artigo 9 Cláusula de Garantía Salarial para o ano 2024

Se o Índice de Prezos ao Consumo (IPC) ao 31 de decembro de 2024 supera o dous por cento (2%), efectuarase unha revisión económica sobre o exceso do devandito tanto por cento, excepto antigüidade, que se aboará en canto se constate o incremento do IPC con efectos económicos desde o 1 de xaneiro de 2024.

Con todo, ningunha categoría salarial do Convenio de Pintura poderá superar á correspondente nas Táboas Salariais de Construción, polo que terán ese tope de suba.

Artigo 9 Prima de asistencia e puntualidade

Establécese unha prima de asistencia e puntualidade, por día efectivo de traballo no ano 2024 de 8,40 euros para os Peóns, de 9,72 euros para os Axudantes e de 10,64 euros para os Oficiais de 1ª e de 2ª.

Este plus de asistencia e puntualidade perderase nas circunstancias e contías seguintes:

• 1. A primeira falta sen xustificación será penalizada con perda de 1’5 días de prima, ademais do salario correspondente ao día da falta.
• 2. A segunda falta será penalizada coa perda de cinco días de prima, ademais do salario correspondente ao día da falta.
• 3. Por cada nova falta será penalizada coa perda da prima correspondente á metade dos días traballados no mes, ademais do salario ou salarios da nova ou novas faltas.
• 4. As faltas deben computarse sempre de cada mes natural.

Artigo 10 Antigüidade

A antigüidade na Empresa será retribuída a razón de dous bienios e tres quinquenios, por día natural, segundo a seguinte táboa:

• - Oficiais de 1ª e 2ª: Bienio 0,18 euros
• – Axudantes e peóns: Bienio 0,17 euros
• - Oficiais de 1ª e 2ª: Quinquenio: 0,36 euros
• - Axudantes e peóns: Quinquenio: 0,35 euros

Artigo 11 Plus de Altura

Todo o persoal que realice traballos en andamios voantes percibirá unha gratificación no ano 2024 de 2,70 euros, por día ou fracción. En andamios de tubos percibirase esta gratificación a partir dos seis metros de altura.

Artigo 12 Desprazamentos temporais fóra da Comunidade Autónoma de Galicia

1. Este artigo regula os desprazamentos temporais do persoal de empresas afectadas por este Convenio para a realización de traballos en obras concretas localizadas fóra da Comunidade Autónoma de Galiza.

2. Cumprimento do Convenio colectivo e das normas vixentes. Nas obras incluídas nestes supostos as empresas deberán vixiar polo cumprimento estrito do establecido neste Convenio ademais da lexislación propia do país de destino, observando sempre, en caso de haber diverxencias entre elas, a condición máis beneficiosa para o persoal desprazado.

3. Tempo de viaxe. O tempo de viaxe desde o domicilio da persoa traballadora ata a obra obxecto de desprazamento será considerado para todos os efectos tempo de traballo efectivo.

4. Por cada 3 meses de desprazamento continuado a persoa traballadora terá dereito a un permiso de 4 días laborais retribuídos no seu domicilio de orixe. Os días de descanso deberán facerse efectivos dentro do prazo de 15 días naturais inmediatamente posteriores á data de vencemento de cada período de 3 meses de desprazamento.

Por acordo individual poderá pactarse a acumulación destes días podendo engadirse ao período de vacacións.

Non interromperá o cómputo dos 3 meses de desprazamento as estadías da persoa traballadora ao seu lugar de residencia por períodos inferiores a 48 horas, sen posibilidade de facer noite no seu lugar de residencia habitual.

5. Gastos de viaxe e estadía. Todos os gastos de viaxe e estadía derivados do desprazamento asumiranse proactivamente pola empresa. A empresa asumirá tamén as viaxes alleas á vontade da persoa traballadora, como cursos formativos, recoñecementos médicos, consultas e probas médicas, etc.

6. Licenzas retribuídas. A empresa garantirá que durante os desprazamentos o persoal poidan acollerse ás licenzas retribuídas previstas neste Convenio.

7. Vacacións. Todo o persoal desprazado terá dereito aos períodos vacacionais previstos nesta norma.

8. Prevención de riscos laborais. Cumprirase nas obras o que obriga a lexislación sobre prevención de riscos laborais.

9. Fiscalidade máis beneficiosa. Todo o persoal desprazado en países que prevexan beneficios fiscais ou sociais para os operarios estranxeiros (7P, etc.) terá dereito a que as empresas lles faciliten a documentación precisa para acollerse a estes supostos.

10. Representación sindical. A empresa dispoñerá dos medios técnicos e loxísticos para facilitar a participación do persoal desprazado nos procesos electorais das empresas coas máximas garantías, garantindo o dereito a información, concorrencia e voto secreto de todo o cadro de persoal.

Artigo 13 Axudas de custo e desprazamentos

O persoal que realice traballos fóra da súa localidade ou residencia e teña necesidade de facer noite no lugar de traballo percibirá unha axuda de custo no ano 2024 de 33 euros diarios, ademais de 2 euros mensuais para lavado de roupa no ano 2024.

O persoal que estea traballando fóra da súa localidade ou residencia, a máis de 10 km de distancia, e non teña necesidade de facer noite no lugar de traballo, percibirá unha media axuda de custo de 10 euros diarios no ano 2024.

O persoal que estea traballando fóra do concello a menor distancia de 10 kms percibirá unha saída de 3,50 euros diarios no ano 2024.

Artigo 14 Xornada laboral

A xornada semanal será de 40 horas, distribuídas de luns a venres, ambos incluídos, aboándose a nómina mensualmente.

No ano 2025 o total de horas anuais será tamén de 1.744. E no ano 2026 o total de horas anuais reducirase a 1.736.

Artigo 15 Roupas de traballo

A todo persoal afectado por este Convenio seralle facilitado polas súas respectivas empresas un mono ou faena de traballo de primeira calidade, cada ano. En caso de traballo que así o requira, entregarase outro máis.

Artigo 16 Licenzas con soldo

Todo o persoal afectados por este Convenio terán dereito a permisos, percibindo o importe do salario diario, antigüidade e plus de asistencia nos casos seguintes:

• 1. Matrimonio da persoa traballadora: Quince días naturais retribuídos.
• 2. Falecemento: En caso de falecemento de cónxuxe, pai/nai, pais/nais políticos/as, fillos/as e irmáns/ás, será sempre de cinco días, para todo o persoal. En caso de tíos/as, será de dous días.
• 3. Nacemento de fillo/a: Será o que sinale a Lei en cada momento.

En todo caso estarase ao disposto no art. 37 do Estatuto dos Traballadores.

Artigo 17 Complemento Plus de Transporte

Estipúlase a seguinte retribución económica en concepto de plus de transporte para todas as categorías de 9,90 euros por día efectivo de traballo no ano 2024.

Artigo 18 Vacacións

Serán de trinta días naturais, percibindo durante estas o salario diario, antigüidade e plus de asistencia correspondente aos días que, de estar a traballar, percibise a persoa traballadora. En todo caso, as vacacións poderán gozarse en dous períodos de 15 días, que de non haber acordo sobre o período do seu goce, 15 días poderán ser escollidos pola persoa traballadora e outros 15 polo/a empresario/a, todos eles naturais.

Artigo 19 Pagas do Nadal e o verán

Serán de trinta días cada unha e aboaranse do salario diario do Convenio e antigüidade. A paga do verán cobrarase no mes de xullo e a do Nadal antes do 24 de decembro. O seu importe é o que figura no Anexo I do Convenio.

As devanditas pagas non poderán ser prorrateadas nos novos contratos.

Artigo 20 Rendementos

Establécese a seguinte táboa de rendementos mínimos:

Metros

• · Tempero liso primeira man 180
• · Tempero liso segunda man 200
• · Pintura ao óleo 1ª man 80
• · Pintura ao óleo 2ª man 60
• · Pintura ao óleo acabado 90
• · Esmalte en paredes acabado rodete 80
• · Pintura plástica en paredes, 1ª man 160
• · Pintura plástica en paredes, 2ª man 180
• · Aparellado e tapado 130
• · Tempero picado a rodete 110
• · Tempero picado a cepillo 60
• · Plástica picado a rodete 100 Unidades
• · Portas imprimidas 25
• · Portas emplastecidas e lixadas 18
• · Portas pintadas 1ª man 18
• · Portas esmaltadas 15
• · Ventás en guillotina imprimidas (sen marco) 60
• · Ventás pintadas 1ª man (interior) 18
• · Ventás pintadas 2ª man 22
• · Pintado oco interior guillotina (vernizado) 30
• · Pintado oco interior guillotina (vernizado) 2ª man 35
• · Portas vernizadas 1ª man 32
• · Lixado e plasticido cravos 40
• · Portas 2ª man verniz 32
• · Portas 3ª man verniz 30 Estes rendementos enténdense en cada xornada de oito horas.

Artigo 21 Constitúese unha Comisión Paritaria

Compoñerase de catro vogais, 2 polo persoal e 2 polo empresariado, e ambos/as pertencentes á Comisión Deliberadora do Convenio. Para a adopción de acordos será necesaria a conformidade de tres vogais, polo menos, en igualdade paritaria.

Artigo 22

Para os efectos de liquidar de maneira efectiva as discrepancias que poidan xurdir para a non aplicación das condicións de traballo a que se refire o Art. 82.3 do Estatuto dos Traballadores seguiranse os procedementos que se establezan a este respecto nos acordos interprofesionais de ámbito estatal ou autonómico, e conforme o disposto no referido Artigo.

1. Esta Comisión Paritaria terá as seguintes funcións:

• a) Vixilancia e seguimento do cumprimento deste Convenio.
• b) O coñecemento e resolución das cuestións derivadas da aplicación e interpretación da totalidade dos preceptos deste Convenio.
• c) A instancia dalgunha das partes, mediar e/ou tentar conciliar, se é o caso, e previo estas e a solicitude delas, arbitrar en cantas ocasións e conflitos, todos eles de carácter colectivo, se poidan suscitar na aplicación do Convenio.
• d) Entender, de forma previa e obrigatoria á vía administrativa e xurisdicional, sobre a formulación de conflitos colectivos que xurdan pola aplicación e interpretación deste Convenio.

2. As cuestións propias da súa competencia que se formulen á Comisión Paritaria deberán presentarse de forma escrita, e o seu contido será o necesario para que poida examinar e analizar o problema con coñecemento de causa, debendo ter como contido mínimo obrigatorio:

• a) Exposición sucinta e concreta do asunto.
• b) Razóns e fundamentos que entenda que lle asisten ao propoñente.
• c) Proposta ou petición que se formule á Comisión.

Ao escrito de consulta acompañaranse cantos documentos se entendan necesarios.

3. A Comisión Paritaria, unha vez recibido o escrito de consulta ou, de ser o caso, completada a información pertinente, dispoñerá dun prazo non superior a 20 días hábiles para emitir a correspondente resolución.

De non haber acordo realizarase informe no que as persoas integrantes da Comisión recollerán as consideracións que, respectivamente, formulen para fundamentar as súas respectivas posicións.

4. Nos supostos en que a Comisión Paritaria non alcance acordo trasladarán, de ser o caso, as discrepancias ao AGA.

Primeira

As retribucións e táboas de rendemento incluídas neste Convenio forman parte inseparable del, e terán forza de obrigar en cada actividade.

Segunda

Complemento de Hospitalización. No caso de accidente laboral ocorrido no centro de traballo e en horario de traballo, e que dea lugar a hospitalización, a Empresa aboará un complemento que, sumado ás prestacións regulamentarias por incapacidade temporal, garanta o cento por cento do salario base do convenio, plus de asistencia e plus de distancia e transporte fixados na Táboa de Retribucións (anexo I) deste Convenio e durante un período máximo de seis meses, salvo que finalice antes do contrato de traballo ou a obra.

Para a obtención do mencionado complemento diario, utilizarase a seguinte fórmula:

• - Fórmula C= (S.C. x 30 + (P.A. + P.DT) x 21 ) – P.R.= r 30
• - Sendo: C. = Complemento diario - S.C. = Salario Base Convenio diario - P.A.= Plus Asistencia
• - P.DT= Plus de Distancia e Transporte - P.R. = Prestación Regulamentaria día - r = Resultado

Cando o resultado da aplicación da fórmula descrita sexa negativo, non procederá aboar complemento ningún.

No caso dunha I.T. derivada de accidente laboral producido no centro de traballo e en horario laboral, o importe das pagas extraordinarias, correspondentes ao seis primeiros meses da baixa, non poderán ser inferiores ao importe que para a súa categoría e nivel figura nas táboas salariais do convenio no seu anexo I.

Terceira

As Empresas virán obrigadas a concertar con primas íntegras ao seu cargo, no prazo de dous meses, unha vez homologado este Convenio, unha póliza de seguros en orde á cobertura dos riscos de falecemento e invalidez permanente absoluta ou gran invalidez, nos termos que seguidamente se dirán, do seu persoal por accidentes de traballo, incluídos os accidentes in itinere, que garanta á persoa traballadora accidentada ou aos seus causahabientes no caso de falecemento ou invalidez permanente producido por causa fortuíta espontánea exterior e independente da vontade da persoa traballadora, á percepción da indemnización seguinte:

• · 40.000,00 euros en caso de falecemento da persoa traballadora por accidente de traballo.
• · 50.000,00 euros en caso de invalidez permanente absoluta ou grande invalidez.

Esta compensación é compatible coa pensión e indemnización que poida causar a persoa traballadora na Seguridade Social. Malia o exposto anteriormente, a indemnización que sexa percibida con cargo ao contrato de seguro de accidentes que voluntariamente se contén neste Convenio, considerarase como entrega a conta da indemnización que, de ser o caso, puidesen declarar con cargo ás empresas os Tribunais de Xustiza, compensándose ata onde aquel alcance.

Cuarta

Contratación. Estarase ao disposto na lexislación vixente. En canto aos contratos fixos discontinuos, fíxase unha limitación máxima de 6 meses de inactividade entre os chamamentos.

Quinta

Empresas de Traballo Temporal ou de Multiservizos. As empresas afectadas por este convenio cando contraten os servizos de empresas de Traballo Temporal ou de Multiservizos garantirán que o persoal posto á súa disposición teñan os mesmos dereitos sociais, laborais e retributivos que lles corresponden ao seu persoal en aplicación do convenio colectivo provincial de Pinturas. Esta obriga constará expresamente no contrato de posta a disposición celebrado entre a empresa de traballo temporal e a empresa usuaria que estea vinculada por este convenio.

Sexta

Pintura Industrial de Chorreo. A empresa proporcionará polo menos dous monos ao ano e algún máis, por se fose necesario, por deterioración dos anteriores. Así mesmo, dotará ao/á chorreador/a dun escafandro homologado para desenvolver o traballo de limpeza mediante proxección de abrasivo seco. Este escafandro estará en bo estado, tendo a alimentación de aire protexida mediante filtro con cartucho filtrante para eliminación de aceites e humidade excesiva e, ademais, estará dotada dunha válvula dosificadora que axuste o volume de entrada de aire.

A empresa proporcionará ao/á operario/a chorreador/a, ademais do equipo citado, botas e luvas adaptadas ao traballo a realizar. Procurarase que estes equipos persoais sexan utilizados por unha soa persoa traballadora, quen devolverá o citado equipo cando abandone a empresa ou estea deteriorado e solicite outro para o seu cambio.

O persoal de chorreo percibirá unha gratificación de 4 € por día efectivo de traballo no ano 2024, compensable e absorbible con calquera outra retribución ou incentivo que viñese percibindo polo mesmo ou similar concepto.

Sétima

O persoal que cese durante a vixencia do Convenio terá dereito a percibir, como atrasos, o tanto por cento que se determine a primeiros de ano entre a representación sindical e patronal, que terá como base o IPC previsto polo Goberno, calquera que sexa o aumento que se pacte no Convenio e compensable coas retribucións superiores que puidese percibir.

Oitava

Establécese o dereito das empresas afectadas polo Convenio a recuperar, ben á conta das vacacións, ou ben con calquera outro día laboral, os días de descanso que concedesen ao seu persoal en datas non establecidas no artigo 14 deste Convenio.

Novena

Igualdade de oportunidades e non discriminación. As partes expresan o seu compromiso en coa igualdade de oportunidades. Nesta materia estarase ao disposto na lexislación vixente.

Décima Plan de Pensións

Establécense nun Anexo II as Táboas de Achegas Provinciais ao Plan de Pensións, para adaptar no Convenio provincial de Pintura o Convenio Xeral no cumprimento do seu Artigo 28º do Libro III sobre o Plan de Pensións:

• - En 2022, dun 1,00 por cento do importe dos conceptos salariais das táboas de 2021 do convenio colectivo que resulte de aplicación, se a persoa traballadora prestase servizos durante todo o ano 2022 a tempo completo ou, no seu defecto, da parte proporcional correspondente.
• - En 2023, dun 1,00 por cento do importe dos conceptos salariais das táboas de 2021 do convenio colectivo que resulte de aplicación, se a persoa traballadora prestase servizos durante todo o ano 2023 a tempo completo ou, no seu defecto, da parte proporcional correspondente.
• - En 2024, dun 1,00 por cento do importe dos conceptos salariais das táboas de 2021 do convenio colectivo que resulte de aplicación, máis un 0,25 por cento do importe dos conceptos salariais das táboas de 2023 do convenio colectivo que resulte de aplicación, se a persoa traballadora prestase servizos durante todo o ano 2024 a tempo completo ou, no seu defecto, da parte proporcional correspondente.

Neste Convenio, como non se realizaron as táboas salariais de 2023, aplicouse ese 0,25% ás táboas salariais de 2024.

DISPOSICIÓN TRANSITORIA

A Comisión Paritaria acordará para os anos 2025 e 2026 as táboas salariais, os pluses, as achegas ao Plan de Pensións e establecerá o Calendario Laboral correspondente.